ញ៉ូវយ៉ក៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឲ្យដឹងថា អស់រយៈពេល ៤៣ឆ្នាំហើយដែលចំណងទំនាក់ទំនងកម្ពុជា-គុយបានៅតែរក្សាបានយ៉ាងល្អក្រោមរដ្ឋបាលរបស់សម្ដេច ដែលស្មើនឹង២/៣នៃទំនាក់ទំនងកម្ពុជា-គុយបាទាំងមូល។
កម្ពុជា-គុយបាបានបង្កើទំនាក់ទំនងការទូតក្នុងខែមេសា ឆ្នាំ១៩៦០។
នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហោះនៅតាមបណ្ដាញសង្គមរបស់សម្ដេចថា៖ «ក្នុងរយៈពេល ៦២ឆ្នាំនៃទំនាក់ទំនងរវាងកម្ពុជានិងគុយបា ខ្លួនខ្ញុំបានរួមចំណែកពង្រឹងពង្រីកទំនាក់ទំនងនេះអស់រយៈពេល៤៣ឆ្នាំ (១៩៧៩-២០២២) គឺស្មើនឹង២/៣នៃការធ្វើដំណើរទាំងមូល។ ទស្សនកិច្ចចុងក្រោយរបស់ខ្ញុំធ្វើឡើងនៅឆ្នាំ២០០០»។
បន្ទាប់ពីឡើងថ្លែងក្នុងអង្គសន្និបាតអង្គការសហប្រជាជាតិនៅថ្ងៃនេះសម្ដេចតេជោនឹងអញ្ជើញធ្វើទស្សនកិច្ចផ្លូវរដ្ឋទៅកាន់ប្រទេសគុយបាផងដែរ។
សម្ដេចតេជោបន្ថែមថា៖ «ខ្ញុំធ្វើទស្សនកិច្ចសារជាថ្មីម្តងទៀតក្នុងគោលបំណងពង្រឹងចំណងមិត្តភាពដែលមានស្រាប់ឱ្យកាន់តែរឹងមាំថែមទៀត»។
ជាមួយគ្នានេះសម្ដេចតេជោក៏បានអរគុណប្រជាជនគុយបាដែលបានជួយដល់ប្រជាជនកម្ពុជាក្នុងពេលដែលយើងជួបការលំបាកបំផុតក្រោយការដួលរលំរបបប្រល័យពូជសាសន៍ ប៉ុល ពត។
សម្ដេចបានបញ្ចប់ដោយសរសេរថា៖ «ជួយគ្នាក្នុងគ្រាក្រស្គាល់មិត្តល្អក្នុងគ្រាលំបាក»៕
